19 वर्षीय तरुणाची डोक्यात वार करून निर्घृण हत्या; आरोपी फरार
शीतल वाघमारे
नवी मुंबई: वाशीतील मिनी सी-शोर परिसरात शनिवारी पहाटे 19 वर्षीय तरुणाची निर्घृण हत्या झाल्याने संपूर्ण शहरात खळबळ उडाली आहे. मृत तरुणाच्या डोक्यावर कथितरित्या कोयत्याने जीवघेणे वार करण्यात आले. हत्येनंतर आरोपी घटनास्थळावरून फरार झाला आहे.
मृत तरुणाची ओळख सुजलकुमार महातो (19) अशी झाली असून, तो कोपरखैरणे येथील एका चायनीज हॉटेलमध्ये काम करत होता. प्राथमिक माहितीनुसार, शनिवारी पहाटे सुमारे 4 वाजण्याच्या सुमारास अज्ञात आरोपीने त्याच्या डोक्यावर धारदार कोयत्याने वार करून त्याची निर्घृण हत्या केली.
घटनेची माहिती मिळताच वाशी पोलीस, गुन्हे शाखा आणि फॉरेन्सिक पथक घटनास्थळी दाखल झाले. पोलिसांनी घटनास्थळाची बारकाईने तपासणी करून महत्त्वाचे पुरावे आणि सुराग गोळा करण्यास सुरुवात केली आहे.
फरार आरोपीच्या शोधासाठी पोलिसांची अनेक पथके रवाना करण्यात आली आहेत. मात्र, या हत्येमागील नेमके कारण अद्याप स्पष्ट झालेले नाही. पोलीस सर्व बाजूंनी तपास करत आहेत.
मोठा सवाल—नवी मुंबईतही सक्रिय होत आहे का ‘कोयता गँग’?
पुण्यात ‘कोयता गँग’च्या नावाने धारदार शस्त्रांचा वापर करून दहशत माजविण्याच्या घटना चर्चेत असताना, आता नवी मुंबईत घडलेल्या या खळबळजनक हत्येमुळे गंभीर प्रश्न उपस्थित झाले आहेत.
नवी मुंबईतही गुन्हेगार धारदार शस्त्रांच्या जोरावर बेधडक वारदाती करत आहेत का? नागरिकांच्या सुरक्षेचे काय? रात्रीच्या वेळी कायदा-सुव्यवस्थेवर कोणाचे नियंत्रण आहे?
19 वर्षीय तरुणाची अशा परिस्थितीत झालेली निर्घृण हत्या शहरातील कायदा-सुव्यवस्था आणि रात्रीच्या सुरक्षेवर प्रश्नचिन्ह निर्माण करणारी आहे.
आता सर्वांचे लक्ष वाशी पोलिसांच्या तपासाकडे लागले आहे—सुजलकुमार महातोचा मारेकरी कोण? हत्येचे कारण काय? आणि या हत्येमागे एखाद्या संघटित गुन्हेगारी टोळीचा हात आहे का?
मात्र, या प्रकरणाचा ‘कोयता गँग’शी संबंध असल्याची अद्याप कोणतीही अधिकृत पुष्टी झालेली नाही. पोलीस आरोपीचा शोध घेण्याबरोबरच हत्येमागील संपूर्ण कारण आणि संभाव्य कटाचा तपास करत आहेत.
