नवी मुंबई। महापालिका प्रशासनाचा भोंगळ कारभार आणि अधिकाऱ्यांच्या आश्वासनांच्या कचरा पेटीमुळे आता नवी मुंबईत संघर्षाची ठिणगी पडली आहे. वाशी विभागातील मार्जिनल स्पेस मोकळी करण्याच्या मुद्द्यावरून कामगार सेनेचे नेते प्रदीप बी. वाघमारे यांनी महापालिका आयुक्त डॉ. कैलास शिंदे यांना थेट इशारा दिला आहे. दिलेल्या शब्दाला न जागणाऱ्या प्रशासनाचा निषेध म्हणून पुढील १० दिवसांत कारवाई न झाल्यास थेट आयुक्तांच्या दालनात मीडियासमोर अर्धनग्न ठिय्या आंदोलन करण्याचा इशारा वाघमारे यांनी पत्राद्वारे दिला आहे.
वाशी परिसरातील मार्जिनल स्पेसवर मोठ्या प्रमाणावर अतिक्रमण झाले असून ते हटवण्यासाठी वाघमारे यांनी १२ मार्च २०२६ रोजी आमरण उपोषण केले होते. त्यावेळी सहाय्यक आयुक्त (अतिक्रमण) अरुण पाटील यांनी ८ दिवसांत व्यापाऱ्यांना नोटिसा बजावून कारवाई करण्याचे लेखी आश्वासन दिले होते. मात्र, 25 दिवस उलटूनही परिस्थिती जैसे थे असल्याने प्रशासनाने आपली फसवणूक केल्याची भावना वाघमारे यांनी व्यक्त केली आहे. लिखित आश्वासन देऊनही कारवाईची फाईल थंडबस्त्यात का? असा सवाल आता उपस्थित होत आहे. या आंदोलनाच्या इशाऱ्यामुळे महापालिका वर्तुळात मोठी खळबळ उडाली असून, पोलीस प्रशासन आणि संबंधित विभागांनाही याबाबतच्या पत्राच्या प्रती रवाना करण्यात आल्या आहेत. आता प्रशासन कारवाईचा बडगा उगारणार की वाघमारे आपल्या आक्रमक पवित्रावर ठाम राहणार, याकडे सर्वांचे लक्ष लागले आहे.
